中環出更:雷太極速試着蛇皮褸

好多人都被乾濕褸吸引,事關可以遮風擋雨外,最重要係可以修埋身,好似Burberry嘅乾濕褸,就更加係經年不衰,如果唔係,九巴新抱雷林靜怡(Jane)就唔會一完咗歐洲春夏時裝騷,就即刻訂購咗件蟒蛇皮乾濕褸返香港啦!

卓妮前日下晝四點幾鐘途經中環歷山大廈間Burberry,望入去就見到阿Jane着住件蟒蛇皮乾濕褸,原來係今年春夏Prorsum系列,香港售價為八萬二千元。

遊法怕入錯紅酒

如果要「早着」先機嘅話,就要喺歐洲嗰邊春夏騷舉行後一個星期內預購,向來緊貼潮流嘅阿Jane當然火速落單啦!

早幾日件褸終於喺英國空運抵港,所以阿Jane就火速落舖頭試身。唔好睇佢已經係媽咪級靚太,但仍保持高挑身材加纖腰,能夠駕馭好多唔同牌子嘅靚衫,當然件蟒蛇皮乾濕褸亦難唔倒佢啦,着上身仲鬆咗少少,於是阿Jane就搵店員幫佢略為修改,遲啲先至攞。

雖然阿Jane近年相夫教子,但都有抽空外遊,早前就同朋友去法國旅行,到著名酒莊歎紅酒輕鬆吓,但佢謙稱唔識飲酒怕入錯貨,所以冇買紅酒返港。阿Jane充完電返港,見佢嗰日着住件豹紋跳傘裝神采飛揚,難怪着住高踭鞋、抽住幾袋戰利品都健步如飛啦!

卓妮

Money18免費即秒股票報價網站現推出8升級功能,財經資訊,實時實發!