中環出更：通脹猛於虎鄭海泉怕怕
通脹猛於虎，繼低下層、中層畀虎咬後，身在上層嘅滙控執行董事鄭海泉都呻猛虎埋身，以前去街市可以唔使睇價錢，但佢話依家都要就住買，難為巧婦日日要洗米落鑊，就更加知米貴喇。去年五百元夠行一轉街市嘅公開大學校長梁智仁太太許安璞，今年一千元先可以離場。再咁落去，莫非卓妮都要食少餐當減肥？
卓妮日前喺一個活動上遇到鄭海泉，佢貴為經濟達人，都忍唔住呻咗句「通脹真係好辛苦！」兩個月前鄭大班去街市買餸，發現豆苗要成四十元一斤，當堂嚇親，以前去街巿睇啱就可以隨便買嘅佢，都笑笑口話要斷両買。鄭大班每年搵幾多位數字，相信大家好清楚，依家連佢都覺得貴，可想而知中下層市民生活有幾苦。
梁太精明煮意 物盡其用
一家之「煮」梁許安璞，緊張餸菜新鮮多過價錢，尋日佢教卓妮去香港仔街市揀靚魚，一百五十元一條芝麻斑尚可接受，但魚膠同葱就貴得驚人，好似三十六元半斤鮮打魚膠，相比以前廿多元就有交易，連葱都要二十六元先有一斤。乜唔係買菜會搭幾條葱嘅咩？
去年中五百元嘅餸菜，依家一千元先埋到單，貴咗成一倍。不過，如果將食物質素同家人健康掛鈎，梁太就點都唔肯將貨就價，惟有出精明煮意，物盡其用抗通脹。比如焗隻雞，主菜用雞髀，雞胸做三文治畀梁生做下午菜，雞骨就煲湯。食唔晒嘅紅酒煮牛尾，就起肉做肉醬意粉。菜硬食唔到？就將佢切粒炒飯或者包雲吞，雲吞皮記得用有鹼水嘅，咁食唔晒放落冰箱都keep到一個月，無嘥嘢自然慳錢又環保啦！
卓妮