陳振聰自爆有私生女
近來備受爭產官司困擾的陳振聰，又被指除龔如心和妻子譚妙清外，身邊還有紅顏知己，最撲朔迷離的就是和他親暱遊英倫的「聰女郎」。對於這名神秘女郎，陳振聰昨接受本報專訪時，親口解開她身世之謎，「佢係我個女」。原來現年二十九歲的博士生倫培珍，是陳振聰私生女。陳坦承這名女兒是他與初戀女友所生，當年他是清貧的未婚爸爸，無力撫養女兒，惟有交給女友親戚照顧，直至十多年前才父女相認，當時他已進身富翁，盡父親責任送女兒留洋，他更開心說女兒明年結婚，他將榮升外父。
洋名Polly的倫培珍，近年穿梭於英國和香港，曾被爆出在兩地住豪宅及坐名車，又與陳振聰把臂同遊英國，甚至被暗示是被陳振聰「包起」的情人。而陳一直未有公開澄清，令她身份更加神秘。與譚妙清已育有兩子一女的陳振聰，昨終於開腔打破謠言，承認還有一名親生女兒，即是該名常被傳媒追蹤拍攝的女子倫培珍，也是他的長女。
90年代相認 妻子唔想提
說起長女的身世，陳振聰自爆是他廿多歲時與初戀女友的結晶，當時他還未認識譚妙清，「三十年前我好細個，當時都幾曳，同初戀情人拍拖，佢有咗無同我講，到我知道時佢都有咗幾個月啦，咁就決定生出來，佢嗰邊有親戚話屋企都有細路仔，可以幫手照顧埋，咁一生咗出來就交咗畀佢哋。」
陳坦言，當年自己年少無知，加上經濟環境欠佳，沒有能力盡父親的責任，女兒跟隨「榮叔」和「蝶姨」一家生活，期間曾移居澳門居住多年，直至九十年代他才與女兒相認，「當時有親戚做中間人聯絡，我哋先相認番，咁我嗰時環境好啲，梗係要盡力照顧吓佢，我送囡囡去英國讀書，佢讀得好好，係皇家學院（King's College）數學系碩士，依家就響倫敦政治經濟學院讀數學系博士。」
雖然分隔兩地，但父女經常講電話和見面。至於有私生女的存在，陳振聰說家人十多年前已知悉，長女亦有回港出席家庭聚會，惟妻子譚妙清採寧知莫見態度，「佢係知嘅，但唔想討論唔想提。」
不倫戀老作 女兒將結婚
他又透露，女兒稍後將會改回跟他姓陳，但因姓名牽涉大量身份證明文件和學術文憑，手續較為繁複，要花點時間處理，陳又斥責有關不倫之戀報道子虛烏有，會保留追究權利。
不過說起長女，陳振聰盡顯父愛，暫時忘卻官司的煩惱，「囡囡有個好好嘅男朋友，下年就會結婚，我好開心呀。」他開心地說：「囡囡同男朋友拍咗三年幾拖啦，明年會結婚，個男仔姓包（洋名Yibo），係上海人，早排佢哋先去上海見男方父母，Yibo份人好好、好乖仔。」提起未來女婿，陳振聰總是讚不絕口，「Yibo喺英國高盛工作，我囡囡幾年前去佢公司實習時認識嘅。」「舊年囡囡知道我因為官司心情唔好，即刻帶埋男朋友返香港探我，今年我媽媽肝病做手術，又專程返來日日都去醫院睇佢。」至於女兒的生母，陳振聰只說數十年來未有見面，「佢都有自己家庭，唔係咁方便，加上我依家又咁（被刑事調查），費事人哋驚我影衰佢啦。」
記者林靄雲