政情:袋巾傑跨區亂掛橫額

下屆立法會將新增五個超級區議會議席,唔少黨派都計劃派出重量級黨員出戰,唯獨係公民黨就自綁手腳,講明唔會派啲選開地區直選嘅議員轉戰超級區會,令可能人選剩番副主席黎廣德及新入黨嘅前醫學界議員郭家麒之流,缺乏全港性知名度同吸票能力,自己搵自己笨。

不過,近日有人發現本身代表九龍東嘅公民黨黨魁梁家傑(袋巾傑),居然跨區走咗去屬於新界西嘅屯門區掛橫額,令人揣測佢係想為來年轉戰超級區會甚至空降新西參選鋪路,令該區各方人士大為緊張。

公民黨中人解釋,袋巾傑嘅橫額貼到去屯門,並非為咗佢本人,而係為計劃喺新西出選區議會嘅該黨成員拉票,強調袋巾傑無意轉界別或轉區參選。咁又係嘅,自從上屆代表公民黨出戰新西嘅張超雄退黨,前新西支部主席陳家洛又轉任黨主席後,該黨喺新西已無晒具知名度嘅人物,惟有跨區借袋巾傑個名同個樣嚟嚇吓人。

Money18免費即秒股票報價網站現推出8升級功能,財經資訊,實時實發!