中環出更:張宇人支持和食猛「放蚊」

立法會飲食界代表張宇人尋日晏晝現身一個日本飲食界嘅記者會,佢最後一刻先到場,只係坐喺台下,但係就疲態畢露。

回港未適應時差

短短一粒鐘嘅記者會,就見張宇人除咗不時用手機對外聯絡,久唔久就閉目養神兼打呵欠「放蚊」,更加要除低眼鏡用手巾仔抹吓塊面添,係輪到記者會尾聲佢要上台講兩句先至精神番啲,仲識搞氣氛話自己除咗食無乜嘢幫手添。

攰成咁,係咪呢排有乜事特別忙定瞓得唔好呀?張宇人就笑笑口話自己成日都好攰㗎啦,尤其是啱啱去外地公幹同代表立法會去美加職務訪問兩個禮拜,即係去美加視察海濱設施,仲未適應時差,加埋晏晝飯食得太多日本菜搞到飯氣攻心,所以先至一副殘樣現身記者會喎。

「Money18免費即秒股票報價網站」現推出8升級功能,財經資訊,實時實發!