政情：盧振雄退休盛宴攞威
消防處處長盧振雄十月初退休，諗住搞一場告別聚餐，點知就畀人投訴搞得太大。有自稱「消防佬」嘅人話，盧Sir故意將每年年底舉行嘅周年舞會同自己嘅告別宴合併，對外就話合併宴會係為夥計慳荷包，實則係想搞「世紀盛宴」，令更多政經名人與會，兼且剝削咗下任處長首次主持周年舞會嘅機會。
好多人都知，消防處副處長陳楚鑫係下任處長熱門人選，如果周年舞會被盧Sir搞咗，即係佢明年先至有機會主持周年舞會。呢位「消防佬」仲預言，話消防總長黎文軒係「隔世靈童」，將會接替鑫Sir做再下任處長。黎Sir係盧Sir嘅親戚，隔代處長有親戚關係，算唔算一項紀錄呢？
消防處長官會執行委員會回覆話，盧Sir嘅退休晚宴同周年舞會都係佢哋負責，今年適逢處長喺十月初退休，而周年舞會一般喺十一月舉行，為減輕短時間內搞兩項活動，亦為免會員喺短時間內參加兩項活動，又參考過去長官會都試過為前處長將兩活動合併，所以今次都係咁做喎。