政情:方道生醫委補選僅敗

馬尼拉人質慘劇救人英雄、屯門醫院腦外科主管方道生,日前獲醫院管理局頒發傑出員工獎,不過佢喺剛結束嘅醫務委員會嘅委員補選中,就輸咗畀來自私營醫療業界嘅醫學會副會長兼資深兒科醫生陳以誠,未能再下一城。

「沙士英雄」沈祖堯教授舊年因為出任中大校長,辭任醫委會委員一職,因此須進行補選。呢個位係由醫學界成員直選,兩位候選人可謂勢均力敵,方道生作為Jason嘅主診醫生,固然廣為公眾認識,但陳以誠來頭都唔弱,除咗唱兒歌唱到街知巷聞外,多年來亦喺醫學會擔任要職,不時就醫療政策同醫生權益發聲。

最終陳以誠以一千三百票對一千一百一十九票擊敗方道生,差距唔算大。選舉結果公布後兩人都相當客氣,陳以誠話方道生多年來喺公立醫院好有貢獻,廣為市民及醫管局認同,所以一直都以平常心看待今次補選,仲話有方醫生做對手,令佢多咗機會去接觸公營醫生,了解多咗佢哋關注嘅問題。方道生亦強調,今次參選係想將公營醫生嘅聲音帶入醫委會,依家目的已達,勝負反而係次要。

Money18免費即秒股票報價網站現推出8升級功能,財經資訊,實時實發!