中環出更：查理斯王子為郎朗「扑頭」
才華橫溢嘅鋼琴王子郎朗，尋日喺英國查理斯王子手中，接受英國皇家音樂學院授予嘅音樂榮譽博士學位，兩位王子喺台上相視而笑，風采迷倒萬千粉絲。廿八歲嘅郎朗，係獲得有關榮譽博士學位嘅最年輕音樂家，亦係歷來首位華人獲得此項殊榮，以表彰佢多年來喺藝術、慈善及教育領域中作出嘅貢獻。
郎朗接受傳媒訪問時話，獲此學術上嘅榮譽，係一種鼓勵，亦覺得好幸運。佢話去年曾經喺英國皇家音樂學院上了一次大師課程，反應相當熱烈，有學生為此寫論文，亦有好多學生喺學校論壇上發表意見，可能因此學院頒咗呢個學位畀佢喎。不過，郎朗話「大師」稱呼係人哋畀嘅，佢從來冇當自己係大師。
反駁肢體動作非浮誇
對於有人話郎朗演奏音樂時嘅肢體語言同表情過於豐富，因而欠缺音樂嘅內涵和深度，郎朗就回應話，肢體語言同表情只係自然地通過音樂將想法表現出來，佢從來冇想過靠動作去吸引觀眾。