政情:關愛撥款 民主黨扭擰

立法會財務委員會聽日會繼續審議關愛基金嘅五十億撥款,民主黨一直都好想支持,可惜政府唔爭氣,籌唔到款之餘,好多資料都唔清唔楚,搞到民主黨兩面不是人,尷尷尬尬。民主黨之所以支持,全因為佢哋反財政預算案後支持度下跌,相信係因為市民覺得佢哋反對派錢有關。

民主黨尋日公開要求,政府就關愛基金撥款做出三項修訂,包括分三期向立法會申請五十億撥款,聽日先申請住二十億、每季向立法會提交報告,並且安排代表出席相關事務委員會,以及定期舉辦公聽會,畀大眾一個表達意見嘅渠道。主席何俊仁強調,三個要求缺一不可,如果政府唔答應,全黨都會投棄權票。

仁哥仲話,佢尋日喺電話上同督導委員會主席唐英年傾過,對方對分期撥款有保留。其實,財委會投票只要贊成多過反對就搞掂,即使民主黨最終全體投棄權,因為有建制派議員支持,撥款基本上肯定過到。民主黨呢一着既唔使背負反對扶貧嘅惡名,又可以博政府聽佢話修訂,呢一着都算算到盡,不過外人睇就扭擰咗啲。

Money18免費即秒股票報價網站現推出8升級功能,財經資訊,實時實發!