政情：皇家音樂學院授郎朗榮譽博士銜
做咗香港人已經五年、蜚聲國際嘅廿八歲鋼琴演奏家郎朗，今日會喺倫敦英國皇家音樂學院（Royal College of Music）布理頓劇院，獲頒音樂榮譽博士學位，仲會喺英國王儲查理斯手中接過博士學位證書，係中國大陸有史以來第一人得到呢個殊榮，亦都係歷來嘅音樂榮譽博士中最年輕嘅音樂家，真係可喜可賀。
為藝術慈善作傑出貢獻
郎朗嘅唱片公司索尼（Sony Music）話，英國皇家音樂學院決定頒個榮譽博士學位畀郎朗，主要原因係郎朗咁多年來喺藝術、慈善、教育領域中，都作出咗傑出嘅貢獻，對年輕一代有廣泛而深遠嘅影響。其實郎朗自從蜚聲國際後，真係喺國際上有唔少影響力，經常被國際媒體稱為「郎朗效應」、「郎朗鋼琴時代」，認真唔講得笑。
郎朗喺○八年京奧開幕式上嘅八分鐘個人獨奏吸引全球四十億觀眾收睇，佢喺○八年更成立郎朗國際音樂基金會資助同教育優秀嘅琴童，培養未來古典音樂大師。