中環出更：杜振源為善現真身籌款

Simon杜今年接好友Stephen棒出任小母牛籌委會主席之位，日前佢喺自己餐廳GOLD搞咗個慈善晚宴，七十位嘉賓全部係善長，每人捐出一萬蚊嚟歎名廚Harlan嘅巧手名菜，再加埋拍賣名酒同晚宴，輕輕鬆鬆就為小母牛帶來接近百五萬善款。

郭少明霸頭位投晚宴

好多人都好奇怪點解一向低調嘅Simon杜會肯接任做主席，佢話肯公開做善事，全靠Stephen同郭老闆潛移默化，事關郭老闆以前都係做「無名氏」捐錢，後來發現肯企出嚟呼籲更有效集腋成裘，籌更多善款。

鐘錶界陳正欣（左起）、米蘭站姚君達、前仁濟主席吳守基、名媛林李婉冰、藝人黃杏秀、陳百祥、律師周永健伉儷同陳正欣太太，一眾好友聚首做善事。

郭少明霸頭位做善事，撐老友杜振源。 （楊歡成攝）

眼見老友們出錢出力，Simon杜亦唔再收收埋埋。好似今次個晚宴，郭老闆一早就買咗枱同屋企人嚟撐場，到拍賣時段，原本坐最入嗰張枱嘅佢，拿拿臨坐最前，最後用咗廿六萬八千蚊投得Harlan嘅十人晚宴，連埋幾支靚紅酒，合共籌得近八十萬，足證感染力嘅厲害。

兩位Simon都係白手興家嘅生意人，難怪分外投緣，連做善事，佢哋嘅理念都好接近，加上大家又係品酒愛馬之人，所以一拍即合。年前郭老闆搵Simon杜入公益金幫手，對方二話不說就答應，今次輪到對方做host，郭老闆點可以唔兩肋插刀呢？

Simon郭每年嘅莎莎婦女銀袋賽搞咗幾年，可謂有聲有色，下年開始仲會由一班賽升格做三級賽，獎金仲會由一百七十五萬提升到二百四十萬添。