政情：議員母親節掛住拉票
今日係天下母親嘅大日子，好多乖仔乖女都會抽時間陪吓媽媽過節。不過，立法會議員李華明、黃成智就以落區做嘢為先，事關今年底就係區議會選舉，肥仔明係黨團召集人，成智就要參選競逐連任。母親節年年都有，選舉就四年一次，你話邊樣重要啲？
肥仔明同成智尋日孖住現身樂施會活動，肥仔明話，今朝早會落區同市民慶祝母親節，跟住就參加活動體驗做媽媽嘅辛苦，之後仲要帶團去鯉魚門歎海鮮，到夜晚先有時間同老婆去西貢食飯。今年係肥仔明第廿二次同老婆過母親節，稱得上係老夫老妻，難怪肥仔明冇買禮物，反而佢囡囡就準備咗禮物氹媽咪。
至於成智就仲厲害，佢好興奮咁形容自己今日要處理一場硬仗，就係要走入天平邨處理大廈法團問題，所以已經預早慶祝咗。
今年底嘅區選牽連到出年嘅立法會選舉超級區議會議席，相信身為呢班議員嘅家人都預咗嚟近一年會少咁個人，可以做嘅就只有多啲體諒，少啲埋怨。