中環出更：四靚女圍攻 盧文端落疊投資
中環人總是行色匆匆，食飯時傾吓公事係好自然嘅事。尋日中午，卓妮就見到「福建幫頭領」全國政協委員盧文端「一拖四」，同四位靚女喺中環置地廣場Cafe Landmark同枱食晏，期間大家有講有笑，佢又好有風度咁斟茶畀四位靚女，十分輕鬆愉快。原來班靚女們係證券公司代表，特登齊齊出動氹盧文端投資基金。
股票波動 籲小心入市
佢哋食完飯後，由盧文端簽卡埋單，然後分道揚鑣。卓妮上前同盧文端打招呼，問佢做乜咁好艷福同四位靚女食飯，佢就笑笑口話幾位靚女係某證券公司嘅高層同埋Sales，特登同佢推介由某知名星級分析員打骰嘅基金。佢笑稱，喺四位靚女嘅圍攻下，今次唔落疊都唔得喇！
講起投資股市，盧文端頗有心得，話香港股票市盈率低，幾抵買，佢自己就偏愛資源股。雖然港股連跌七日，但佢認為係合理調整。佢仲話，近排股市咁波動，係因為基金調低咗獲利上限，以前目標係賺兩成離場，依家可能有百分之八至十嘅回報就提早離場，所以市民入市要小心。
近排有關下屆特首嘅人選問題又再被提及，盧文端係選舉委員會委員，有選特首嘅經驗，佢話傳說中嘅人選各有各好，佢都唔知點揀，笑稱可能要搵幾支竹籤寫上候選人名字，抽中邊支就選邊個喎。佢愈講愈興起，話古代皇帝都係用呢種方法，決定由邊位將軍帶兵去打仗㗎！
講開打仗，盧文端坦言擔心拉登被殺後，美國等西方國家會遭受恐怖分子報復，所以佢短期都唔會去美國玩囉！
卓妮