繼兩年前捐助嶺南大學設立助學金之後，理文造紙董事總經理李文斌（Edmond）又慷慨捐贈二千七百萬元予嶺南大學，仲將榮譽歸於父親，事關嶺大將主樓以Edmond父親李運強命名。佢哋兩父子尋日就一齊出席嶺大舉行嘅「李運強教學大樓」命名典禮，同場仲有Edmond哥哥李文俊全程陪住，三父子同場，場面非常溫馨。
李運強三父子咁撐嶺大，校董會主席陳智思及校長陳玉樹都笑不攏嘴。嶺大司庫王忠秣尋日都有撐場，佢嘅囝囝王賢訊係Edmond嘅好兄弟，唔知係咪因為呢個關係而令Edmond對嶺大咁支持呢？講番座新教學大樓，稱得上係嶺大嘅地標，樓高四層，設有圖書館、藝術廊、演講廳、課室、電腦實驗室等，總之集教學、文娛及行政設施於一身。