政情：蒙德揚夠薑大阪跑全馬
日本大地震引發核輻射擴散，好多人為安全計都暫時唔去日本，但同日本生意往來頻繁嘅信興集團副主席蒙德揚（David）就唔驚得咁多，喺地震發生前兩日去過東京，但最近又要再過去公幹，今次目的地係暫未受影響嘅大阪。
現時有好多外資企業都主動將總部由東京轉移到大阪等關西地區，David都覺得大阪係個安全地方，加上佢哋公司基地喺嗰邊，所以無可避免要過去，而且要親身到訪以示支持。嚟緊十月，David仲會去嗰邊跑馬拉松，總之無懼核輻射危機。
David仲大讚日本市民經歷咁大嘅災難，ＥＱ仍然好高，市面大致正常。不過，佢笑言自己每日都喺工作中度過，所以唔覺得有咩大轉變喎。David仲話，佢好多朋友都年近半百，大家都話就算真係感染到核輻射，有病都分辨唔到係咪核輻射影響，所以都係嗰句，活在當下最重要。