政情:馬時亨入農行做非執董

內地銀行都好鍾意請財金界前官員或者猛人做獨立非執董,四大行原來都有咁做。繼中國銀行請咗香港交易所前行政總裁周文耀、建設銀行請咗金管局前總裁任志剛同工商銀行請咗前財政司司長梁錦松,終於輪到農業銀行出手,請前財經事務及庫務局局長馬時亨出任獨立非執董。

三月已獲委任

今次農業銀行羅致馬時亨,原來早就喺今年三月二日嘅臨時股東大會之上,已經通過委任,聽聞仲已經得到銀行業監理委員會批准,委任由上周一正式開始。

肥亨之前離開政府係基於健康理由,因為發現腦裏面生咗個血管瘤,佢一年後復出做中策非執董兼主席,話係工作量輕鬆可以應付,但係早前肥亨舊同事、商務及經濟發展局局長劉吳惠蘭因為生癌請辭,肥亨話佢自己個腦仲有病,唔可以受壓力,所以就算政府請佢回巢都唔會應承。

依家獲邀為農行非執董,肥亨又欣然接受,睇嚟工作量嘅嘢,係輕定重,最緊要係自己嘅感覺嘅啫。

Money18免費即秒股票報價網站現推出8升級功能,財經資訊,實時實發!