中環出更：陳仲尼白富鴻豪飲二鍋頭
神州之大，美食處處是。香港一班富二代，早前上京參加「青年領袖高級研討班」，除研習國情外，唔少得品嘗大江南北美食，菁英會主席白富鴻話，難忘喺蒙古包歎正宗蒙古菜，佢同全國青聯副主席陳仲尼（Rock），更被捉上台敬酒，一啖乾晒一大碗二鍋頭酒。
交流團喺四月八日出發，為期七日六夜，吸引近六十位才俊參加，唔少富二代包括信置主席黃志祥公子黃永光、康泰旅行社太子爺黃進達、香港青聯常務副主席葉振都、副秘書長詹勝及司庫彭芷君都有份。
白富鴻話，研習堂喺國家行政學院舉行，每日上堂上足六小時，絕非柴娃娃。學乜呢？由香港《基本法》、孫子兵法，以至西藏現況問題都涉獵到。大夥兒落堂後，就捐窿捐罅搵食，佢哋發現一處蒙古菜，餐廳布置成蒙古包，認真鬼馬。
有貴客到，開餐前，餐廳特別安排放煙火，夠晒大陣仗。阿Rock、白富鴻同葉振都一馬當先，為巨型烤羊「開光」，呢個只係前奏，重頭戲係，由阿Rock同白富鴻按傳統高舉大湯碗敬酒。
湯碗內係烈度十足嘅二鍋頭，兩人要一啖乾晒，真係少啲酒量都頂唔順。阿Rock同白富鴻相對望幾秒後，決定照飲可也。豪氣表現，博得全班同學掌聲。不過，二鍋頭的確幾「拿」喉，飲咗幾啖後，兩人終於頂唔順，轉飲紅酒，都算有交代嘞！