中環出更：袁振寧勇闖仙台
日本地震幾乎震冧當地旅遊業，以日本線為主嘅本港旅行社備受打擊，縱橫遊係其中之一，生意較災前少咗九成。卓妮日前見到冧莊做博愛醫院總理嘅縱橫遊業務顧問袁振寧，佢對日本市場不離不棄，仲勇闖重災區仙台，為生意夥伴打氣。
當地人好堅強
袁振寧去仙台期間，曾與當地觀光部門交流，佢話當地已有限度恢復正常生活，只係夜晚提早停止商業活動，以節省能源。佢又話當地人好堅強，諗法好正面，報章電視廣告十之八九都係鼓勵大家站起來，唔似外界諗得咁悲觀喎。
袁振寧話，現時旗下生意只得災前嘅一成，團費就減至災前嘅七成，五日行程只係收四千幾元。生意唔見咗九成咁多，難得袁振寧仲好樂觀，話好過冇得做喎！經過今次嘅考驗，佢話學識咗點樣處理危機，相信袁爸爸交盤生意畀佢，大可以放心啦！