政情：棠哥學唱歌半途而廢
工聯會會長兼港區人大代表鄭耀棠平時捍衞勞工權益嗌到聲嘶力竭，但原來佢歌喉都有番咁上下，首本名曲係《把根留住》、《莫斯科郊外的夜晚》等等歌曲。棠哥尋日喺大氣電波同聽眾分享往事，自爆十幾歲時曾經瘋狂到花近三分一嘅人工去學唱歌，但最後都因為學費太過貴而半途而廢。
棠哥話，當年讀完書啱啱投身社會，人工每月三百多元，以當時嚟講唔算高，但因為佢太喜歡唱歌，所以搵咗個歌唱老師教佢發音同運氣，但要成八十元四堂，上咗幾個月後覺得經濟上負擔唔起，惟有忍痛放棄。其後棠哥轉移苦練普通話，經常偷聽內地嘅電台頻道，學得今日一口流利普通話。
至於點解棠哥咁鍾意唱有關中國嘅歌曲呢？棠哥話，以前讀教會學校，宣揚民主、博愛、平等訊息，點知踏出社會所見嘅竟然係第二個世界，亦唔明點解外國人特別歧視中國人，結果就去了解中國國情，最後仲加入工會，正式踏上工運之路。