政情：謝曼怡唔恨接替Rita劉？

商務及經濟發展局局長劉吳惠蘭（Rita）上周因腸癌辭職後，邊個接手呢個「三煞位」成為政商界焦點，接任人選名字滿天飛，除咗該局兩位常秘黃灝玄及謝曼怡外，其他政策局常秘都有人提起，未知花落誰家。正當大家估估吓之際，謝曼怡尋日忽然高調率領本港科研界訪京四日，推動雙方在創新科技領域上嘅合作，期間仲會同國家科學技術部會面添，莫非佢有機會跑出？

謝曼怡一直都係煲呔曾愛將，○七年起由行政署調任特首辦常秘，三年後調任商務及經濟發展局就坐正D8（首長級第八級），升職速度快過搭直升機，加上有傳佢係下屆局長嘅大熱，所以要佢做Rita接任人並非無可能。不過，有政府中人認為，謝曼怡今年只有四十八歲，加上做咗常秘冇耐，資歷上似乎未到局長個位。

另外，熟悉謝曼怡嘅人都知道，佢根本唔想咁快升職，皆因佢向來好尊重老公、現任發展局常秘周達明，唔想自己職位高過老公，所以就算被選中接替Rita，都未必應承喎！

Money18免費即秒股票報價網站現推出8升級功能，財經資訊，實時實發！