政情：唐唐失職畀內地婦狙擊

近年來港產子嘅內地孕婦數目倍增，逼爆本港公立醫院嘅產房同兒科病房，炸彈早前終於爆發，公院醫生群起要求港府正視問題，向來只識「頭痛醫頭、腳痛醫腳」嘅周一鑊，隨即匆匆宣布暫停接收內地孕婦到公院生仔。但呢個落閘政策旋即又引起其他後遺症，將老公係香港人嘅內地孕婦亦一併拒諸門外，辣㷫全中國中港家庭，繼而引發日前嘅狙擊周一鑊事件。

遭示威者怒吼嚇窒

中港家庭權益會尋日朝又到政府總部門外示威，但由於行會並冇食衞局嘅議程，所以唔見周一鑊，反而等到唐唐喺中座大堂舉行新聞發布會。示威者見有大批傳媒採訪，就喺唐唐宣讀新聞稿時，不斷用大聲公高呼反對落閘政策嘅口號，聲浪大到連在場記者都幾乎聽唔到唐唐噏乜。平日講嘢經常口窒窒嘅唐唐，更加畀班示威者嘅怒吼，嚇到差啲連照稿讀都讀唔到。

雖然權益會今次狙擊唐唐，有多少誤打誤撞嘅成分，但其實內地孕婦來港生仔問題，絕對關唐唐事，甚至需要負上最主要責任。皆因中港婚姻問題、單程證同雙程證政策、以至邊啲人可以來港生仔同取得居留權，全部都係香港人口政策嘅關鍵要素。人口政策由邊個高官負責？咪就係身兼人口政策督導委員會主席嘅唐唐囉！

唐唐自○七年接任政務司司長後，就一直懶理人口政策問題，直至近年愈嚟愈多內地孕婦來港生仔，港府喺去年施政報告先開始亡羊補牢，宣布重新開始研究有關問題。唐唐對有關檢討歎慢板，到公院爆煲時又藥石亂投，一刀切禁晒所有內地孕婦來港，先至弄致尋日畀人玩到嘢都講唔到嘅田地，真係早知今日，何必當初！