中環出更：七叔新金王 揼水撐港大
香港大學為咗長遠支持傑出教授而設立嘅明德教授席，愈來愈受城中善長支持。尋晚港大舉行第五屆明德教授席就職典禮，捐款嘅善長、客座教授及前來撐場嘅親朋戚友濟濟一堂，將港大校本部嘅陸佑堂逼到水洩不通。
撐場陣容最龐大嘅首推「新金王」金至尊主席黃英豪（Kennedy）家族，及人稱「七叔」嘅名人飯堂「福臨門」後人徐維均，難怪開心到極嘅港大校長徐立之許下宏願，要喺離任前令明德教授席由現時五十四席勁增至一百席！
Kennedy嘅爸爸黃乾亨、阿叔黃乾利一向係明德教授席嘅超級擁躉，兩兄弟今年又分別捐贈兩個基金，支持政治經濟學及植物生物技術學嘅研究，其中政治經濟學嘅履任教授係知名經濟學者王于漸。Kennedy一早就陪住老人家到場，而且撐足全程，家姐黃英琦後來才現身。
黃英豪家有四張明德椅
港大好有心思，會向每位捐贈達一千萬元嘅善長送出一張仿明設計嘅酸枝椅，名之為「明德椅」。黃氏兄弟咁捧場，屋企實儲埋好多明德椅喇！Kennedy聽到卓妮咁問，有話直說：「屋企已經有四張，但係仲未夠，會繼續捐錢㗎！」反映黃家對學術貢獻真係好有心。
七叔徐維均就以爸爸名義捐贈咗徐福全基金，履任教授係血液腫瘤專家鄺沃林教授。尋晚七叔帶埋一對子女到場，家姐就有囡囡陪伴，一家人扶老攜幼撐港大。平時好少曝光嘅七叔囝囝徐德耀本身係醫生，當年為咗接手家族生意而棄醫從商，難得佢不忘支持醫學，今次仲有緣重逢當年佢差點跟隨做研究嘅鄺教授添！
任期明年就屆滿嘅徐立之，見到呢個基金咁受歡迎，話要向一百席邁進，佢仲捉住負責基金項目嘅港大校長資深顧問程介明影相。不過，徐校長患得患失話：「如果提早達標，咁我咪要早啲離任？」言下之意，對港大好唔捨得喎！
卓妮