今屆政府同立法會嘅關係一直緊張，繼政務司司長唐英年去信立法會，不滿議員出言侮辱官員後，尋日喺立法會內務委員會上，就輪到班議員批鬥番唐唐侮辱立法會。
有議員投訴，早前財經及交通事務委員會聯合會議討論汽車保險問題，但政策局官員人影都無隻，對此極為不滿。唐唐解釋，因為保險問題涉及運作及技術問題，而非政策問題，認為派署級官員較為恰當。
唐唐嘅回覆明顯令議員嘅怒火加劇，工聯會潘佩璆表明，討論技術問題都會牽涉政策範疇，質疑當局特登派唔對等嘅官員嚟開會，等於大家「雞同鴨講」，逃避問題。泛民主派議員鄭家富就怒轟唐唐「矮化立法會」，同時質疑唐唐彈弓手，冇解釋清楚點界定何謂政策問題，係對立法會不尊重。
代表立法會同唐唐會面嘅內會主席劉健儀（Miriam）都鬧埋一份，話唐唐始終「堅持己見」，唔止一次錄音機上身，叫各委員會主席日後直接邀請局方代表出席，好過自己喺度激氣喎！聽完議員同唐唐嘅口水戰，真係印證潘佩璆口中嘅「雞同鴨講」喇！