政情：鄧耀邦成家族「御用中醫」
東華三院董事局向來臥虎藏龍，「舖王」鄧成波四公子鄧耀邦（Jason）都係當中一員。Jason第二年擔任東華總理，唔少人以為佢學爸爸一樣，叱咤地產界，其實佢熱愛中醫，現時喺廣州中醫藥大學鑽研針灸推拿碩士，家人有乜頭暈身㷫，都搵佢做「御醫」。
東華日前就職禮，鄧成波低調地撐愛兒，波叔神龍見首不見尾，儀式結束後快閃。廿八歲嘅Jason，樣子似足後生嘅波叔，性格相當健談。Jason話，三個哥哥及弟弟較多涉足家族生意，但佢就喜歡做中醫，喺廣州一讀就八年，難得爸爸好開明，任由佢發展。
執安胎藥畀太太
Jason道出學醫傳奇，原來佢中學時遇上神醫，教佢內丹氣功，自此病痛全消，覺得中醫理論博大精深。因為要上堂，Jason不時穿梭中港兩地，又要兼顧東華公職，認真唔簡單。月前Jason太太Joni誕下可愛BB女，Joni話，佗仔期間，老公不時為佢執藥安胎，家人唔舒服，都會搵Jason把脈喎。