政情：騰雞美華嗌停鄉會修章

屯門鄉委會前排成功修章，令到原居民不能以太平紳士身份成為鄉委會當然執委，更封殺連任過三屆鄉委會主席嘅人冧莊，此舉明顯衝着發叔而來，結果發叔失落於鄉委會主席，連帶佢以此進身成為屯門區議會當然議員及區會主席兩個身份都無埋。元朗廈村鄉鄉委會早前又成功修章，打破阻止新人角逐主席嘅荒謬章程。連續兩個鄉委會修章，惹來鄉紳及鄉議局關注。

突然出手 林偉強唔使走住

騰雞美華可能見鄉民群情洶湧，靜雞雞決定檢討鄉委會制度，仲即時發信要求廿七個鄉委會要維持原有訂立嘅規章，即係暫時唔可以再修章。呢個突然其來嘅「檢討」，就打亂咗正打算修章嘅坪洲鄉委會嘅算盤。據聞坪洲鄉委會修章同屯門鄉委會一樣，令太平紳士不能自動成為鄉委會執委，變相令身為太平紳士嘅林偉強無得留低，如今政府出手阻截，惹來偏幫之嫌。

成功踢走林偉強當上坪洲鄉委會主席嘅黃漢權透露，政府同佢哋講明，就算鄉委會通過修章都好，民政事務專員都唔會簽署確認，聲稱當局現正檢討村選及探討規範鄉委會選舉。咁啱尋日立法會民政事務委員會上，鄉議局副主席張學明就追問，政府幾時立法監管鄉委會？騰雞美華證實，當局確實係會研究立法監管鄉委會選舉，希望鄉議局配合，至於立法時間就係「盡快」。

可能大家無留意，其實政府就立法監管鄉委會已經研究咗好幾年，只係一直得個桔，點解到呢個時候才先至話檢討？明眼人一睇就知，實情係見發叔件事後才如夢初醒，亡羊補牢急急阻止其他鄉委會修章，只係林偉強咁好彩避過逐出鄉委會大門嘅命運。黃漢權話，佢唔排除會提出司法覆核，挑戰政府拒絕鄉委會修章嘅權力，今鋪政府都算係捉蟲囉！