中環出更：巴塞爾食中菜 鐘錶行家摸門釘
由鐘錶界業內人士組成嘅香港鐘錶業總會愈趨鼎盛，上月瑞士「巴塞爾鐘錶展」（Basel World）開鑼，一眾行家蜂擁過去睇新貨，為來年銷售策略做好準備。不過，行家之間並冇各據山頭，反而同在他鄉親切如家人，期間仲約埋去展覽會場附近間「香港飯店」食中菜聯誼，令業界更團結。
原來近年總會每逢參加Basel展，都會貪就腳去幫襯「香港飯店」，對佢哋呢班經常四圍飛嘅大忙人來說，食得西餐多，自然嚮往食餐家常便飯。總會主席朱繼陶話，飯店嘅蒸魚同咕嚕肉最好味。不過，今年去到間飯店已經執咗笠，雖然隔籬有間泰國菜館，但辛辣菜式唔係個個受得住，所以霎時間無咗「飯堂」搞到大家好頭痕。
當大家正打算勒住肚皮之際，好彩有鐘錶界老行尊孫秉樞帶路，孫生帶大家去咗萊茵河畔一間酒店食飯，等大家一邊用餐一邊欣賞萊茵河嘅優美風光，兼且可摸住酒杯底交流鐘錶界嘅未來發展，真係好不快哉，而且價錢相宜，每人約一千多港元。