夕陽政府已變跛腳鴨，號令不行，施政無方，想做好份工如老鼠拉龜，無從下手，本屆政府日子難過也。特區政府的管治班子無才無德，做事冇承擔，食飯大過天，吹水勝神仙，推政策最終落得「自欺欺人被人欺」。
高官頻頻出醜，究其因，昧於形勢一意孤行，假諮詢漠視民意，有乜辦法唔撞板多過食飯？有些事，一放難收，衍生不少問題。
好似放寬內地孕婦來港產子，引發本地孕婦一度上街抗議。政府在○五年實施登記制度，後來更把內地產婦赴港產子，須先繳交二萬元產科服務套餐收費增至近四萬元，此舉卻為私家醫院開闢財路，皆因公私營收費拉近，經濟條件較佳的內地孕婦梗揀質素較好的私院，私院年收入以億元計。
當然，公立醫院亦飽和，卻由於壓力大致不少醫生走去私院「搵真銀」，搞到公院員工工作量超出負荷大叫救命，政府後知後覺連忙提出以八萬八為上限。私家醫院賺開有條路，睬你都傻！眼見內地孕婦湧港產子年年升，政府卻懶懶閒，一直沒有任何制衡政策及監督，如今私院不買帳，實是自取其辱。
私家醫院婦產科一枝獨秀，明年龍年，料內地孕婦來港產子必上升，估計有十萬嬰兒出生，倘一半係內地孕婦，公私營產科必飽和，私院已作好準備，自然收錢收到手抽筋，公營產科醫護人員則做到有氣冇碇抖。政府當務之急，不是埋怨私院無良，而是廢無能高官穩定人心，招募及培訓婦產科醫護人員，搶回私院生意以報背諾之仇。