政情：周一鑊現身下台標語贈興
食物及衞生局局長周一鑊對前線醫生工時過長闊佬懶理，搞到醫生對佢積怨極深。有人甚至趁佢尋日下晝去衞生防護中心，主持世界衞生日慶典嘅時候「踩場」，將一架貼滿反對周一鑊標語嘅私家車停正喺衞生防護中心門口，標語寫明叫周一嶽落台返屋企瞓覺，擺明落佢面！周一嶽走嘅時候睇唔到就走咗。
靚車貼滿海報
嗰架黑色靚車停正喺衞生防護中心大門口，人人都睇到，車頭車窗同車尾貼咗差唔多十張反對周一鑊嘅A4黑白海報，其中一張周一鑊疑似開會瞓覺相，上面諷刺咁寫着：「周局長，你累了，請你下台回家睡」，另有海報就控訴前線醫生工時長達十幾個鐘，令市民得唔到適當照顧，總之係琳瑯滿目。
記者翻查車輛登記資料，發現架車原來係屬於聯合醫院一名內科醫生嘅，呢間醫院近期都走唔少醫生。屯門醫院內科醫生吳志豪就話覺得今次行動好勁、好成功。啲醫生咁嬲，睇嚟呢啲咁勁嘅請願行動，一定會愈嚟愈勁！