政情：劉兆佳帶病箍票保人工

中策組不必負責政府裏面嘅特定政策，都要出面拉票，真係一百歲唔死都有新聞聽。佳叔為保住自己份工拉票，更加係難為咗佢。尋日有建制派成員透露，佳叔做手術前不停打電話箍票，因為擔心泛民提出刪除中策組預算嘅修訂通過，變相癱瘓中策組運作喎。

佳叔病假 下屬幫手

佳叔下咗一輪苦功，原本建制派議員都應承佳叔坐定定投票撐中策組，點知事隔兩日，即係佳叔入院當日，中策組副首席顧問葉文輝又再來電，又話專誠為拉票而來。大家對兩人嘅舉動感到好奇怪，以為中策組真係好驚青，搞到要輪流發功，後來才知原來佳叔放病假至預算案投完票後先返工，難怪下屬要步步為營，特別小心，費事要佳叔放假都放得唔安樂。

有收過電話嘅議員話，今次可算係中策組歷史上第一次箍票，不過就唔係人人受落。有部分議員認為，扣人工或者刪預算都只係泛民表達政治立場嘅招數，明知唔會通過分組點票呢一關，覺得中策組過分憂慮；不過亦有人覺得，立法會早前歷史性否決臨時撥款議案，已經係開創先河，港府有乜要投票都唔可以再大安旨意，所以覺得佳叔勤力打電話，確認自己有幾票喺手，都算係吸取咗財經事務及庫務局局長陳家強嘅教訓，唔再做蠢事。

「臨界點」扮失憶出事

中策組從來都係比較獨立嘅諮詢組織，一向好少人向佢哋開刀，所以從來都未諗過有人話要刪佢哋預算。點解今年會特別惹火？怪就要怪佳叔最近頻頻出錯，一時發表「臨界點」論喪鬧政府懶理民意，轉頭又扮失憶話自己冇講過，自打嘴巴之餘仲影響誠信。後來更被踢爆中策組嘅民調題目，係問人財政司司長應否下台，認真尷尬。加上中策組喺「史上最廢」預算案上拿捏民意失敗，係分化社會嘅幫兇，如果佳叔一開始做好少少，就唔使依家要箍票咁頻撲啦！