政情：譚香文大爆嫻姐動向
涉嫌賄選搞到官司纏身嘅前公民黨立法會議員譚香文（Mandy），尋晚喺人民力量起動大會上出現，由於太令人感到意外，一眾傳媒即時上前問問近況。Mandy見慣大場面，自爆已經成立一個有五百粉絲嘅後援會，今個星期會有成立典禮添。
早排有傳工聯會票后陳婉嫻會參加年底區議會選舉，仲盛傳佢會揀Mandy老巢黃大仙嘅鑽石山選區出選，志在搵Mandy祭旗以壯聲勢。Mandy尋日從容不迫咁話自己從來冇話出選，所以冇有怕咁話；佢仲話，如果嫻姐真係喺鑽石山出選都係好事，因為以對方咁有江湖地位，落去服務街坊都係好事。
Mandy做過立法會議員，當然唔係豆腐，以為佢咁快向嫻姐認輸？咁就錯喇，佢之後繼續大爆潛在對手嫻姐動向，話聽聞對方其實一直都有喺藍田同慈雲山做民調測人氣，所以最終係咪去鑽石山選都唔知。睇Mandy躊躇滿志個樣，似乎對自己好有信心，唔知佢最終又會唔會出選呢？