政情:徐立之與武俠小說絕緣

唔少人睇親武俠小說都廢寢忘餐,誓要由頭睇到結局先肯罷休。不過對於香港大學校長徐立之嚟講,睇武俠小說直情係一件苦差,事關科學家出身嘅佢太着重分析,亦因為佢嘅科學家性格,令佢連電影都好少睇。

徐立之尋日現身由港大同香港青年協會主辦嘅青年領袖教室開幕禮,同現場近四百位中學生分享對開拓中國未來嘅意見。主持問台上嘉賓,有邊齣戲可以令人了解今日中國,徐立之即刻投降話自己平時好少睇戲,近年喺香港,基本上只係睇咗兩套戲,就係《色戒》同《唐山大地震》,同學仔一聽到《色戒》,不約而同笑起上嚟。

徐立之即時補飛,解釋因為佢太鍾意分析,加上記性唔好,每次都要睇番轉頭先了解上回講緊乜嘢,所以除咗電影外,連武俠小說佢都無法子好似一般人咁由頭窮追到尾,基本上連第一本武俠小說都睇唔完,之後嘅更加睇唔到落去。科學家原來有咁嘅特質,真係唔講唔知!

Money18免費即秒股票報價網站現推出8升級功能,財經資訊,實時實發!