政府早前公布顧問公司做嘅研究，結果發現超過七成回應者認為本港有光污染問題，市民要求立法規管嘅聲音愈嚟愈大。講開光污染，政府帶頭嘅「幻彩詠香江」，其實亦係光污染嘅始作俑者，搞到日日花市燈如晝。
早幾日立法會環境事務委員會首次傾光污染問題，議員追問當局幾時就光污染立法。署理環境局局長潘潔一味廢噏，你就知道政府搞環保只能得個吉！
夕陽政府啲高官個個但求獨善其身，施政不問責，一味拖得就拖，潘潔話會先向業界推出一份自願性嘅《戶外燈光裝置業界良好作業指引》，哎呀！真係作孽咯！又係乜乜最低工資指引嗰招「龜縮功」，份指引又係連標準都冇，只係講過——算！
「建議只維持必須的照明在可接受的水準內」、「當不需要時關掉戶外燈光裝置」，如果咁嘅指引，就可令白亮污染、人工白晝、彩光污染呢三類污染消失，咁潘潔同邱騰華都可以功成身退，跟手摺埋環境署及環境局，慳番啲公帑派街坊實際些。
光污染除了使空氣污染愈來愈嚴重，美國的研究更指出，人工白晝會影響褪黑素分泌，進而導致人體機能失衡，甚至可能導致抑鬱。褪黑素在人體內擔當重要作用，如改善睡眠、具有抑制細胞癌變的能力。為減少戶外燈光污染，在美國有「黑色天空法律」，已有不少州、鎮和城市採用了該法律。為市民大眾的健康設想，政府切勿一味「作孽」指引，畀啲承擔，速速立法規管光污染！