中環出更：陳永棋頭馬香檳贈老友
馬場近排多咗唔少屢戰屢勝嘅黑馬，帶挈名人馬主接二連三開香檳。好似全國政協常委陳永棋匹愛駒「精密紡」，前日喺快活谷夜馬出賽，喺第二場以大熱姿態跑出，今次已經係棋哥季內第二次拉頭馬。馬會例牌送支香檳畀馬主返廂房同老友慶祝，不過棋哥影完相轉頭就將支香檳轉贈畀朋友，原來佢唔鍾意香檳有氣嘅感覺。講起愛駒，棋哥話隻馬以前成績一般，但係最近終於開竅，相信係因為佢同騎師黎海榮夾到喎。
短期之內雙喜臨門嘅仲有仁濟醫院主席董吳玲玲，佢有份嘅團體馬「開心老友」當晚第八場出賽，不負眾望大熱勝出，贏得逾四十八萬元獎金，董太及老公董中浩同成班開心老友齊齊拉頭馬。卓妮問董生點樣慶祝，佢笑稱要請老友食飯慶祝一番，除咗獎金之外，董生又落重注買二萬蚊獨贏，額外贏得七萬幾蚊彩金，佢笑稱，唔買多啲點夠請客呢？
