日本九級大地震引發核危機，立法會今日會議上將會討論由民建聯議員黃定光提出，關注日本核事故對香港各個範疇影響嘅議案。議員甘乃威同馮檢基提出修訂，加入要求港府擱置提高核能比率嘅內容，成件事即刻唔同晒，據講對於呢項無約束性嘅議案，一向懶散兼虛怯嘅環境局都竟然派人箍票，認真少有。
環境局局長邱騰華早排宣布，政府打算將核能發電比率大幅提高到佔香港總供電量五成，呢個計劃最初公布時社會反對聲音未算好大，不過自從日本發生核事故後，全球反核浪潮浪接浪，泛民議員見機不可失，即時要求政府擱置呢個計劃。政府可能好擔心會引發另一個政治風波，早排已經打晒電話箍票，希望否決修訂。
據部分建制派議員講，環境局做嘢一向唔積極，今次都係第一次收到佢哋嘅箍票電話，估計同上次臨時撥款畀人否決單嘢有關，好擔心唔覺意又出事。政府如意算盤打唔打得響就聽日先知，唔知班建制派點抉擇呢？