政情：葉劉談派錢自打嘴巴
財爺鬍鬚曾月初「跪低」派錢保超廢預算案順利通過，唔少建制派拍爛手掌歡迎，好似新民黨主席葉劉淑儀咁，派錢方案一出，即時話「好歡迎財爺接納新民黨建議」，差啲未寫橫額成功爭取派六千蚊。但佢尋日出席一個午餐會時就忽然掉轉槍頭，喪插鬍鬚曾派得唔乾脆，又話派錢令市民對政府多咗期望，到經濟轉差時都唔知點算，好唔負責任。當記者追問點解當初提議派錢，葉劉先呆一呆，之後解釋話覺得透過關愛基金派錢係不負責任，而唔係話政府派得唔啱。
葉劉又話，如果政府增加公眾向心力，派錢就應該快狠準，最好兩個月內搞掂，又話可以學澳門咁，新移民派一半就唔使咁多紛爭，大家可以樂也融融咁分享成果。但唔係個個有得分嘅都覺得開心，有份出席午餐會嘅中產人士就同葉劉講，相信在座嘅人都唔覺得有需要收多六千蚊，葉劉就話就算佢唔需要，有得分都應該會開心喎！