政情：人民力量寸社民連「有破壞」
發展商計劃喺美孚新邨起屏風樓，搞到班居民怨聲載道，嚟緊
個周日仲會搞瞓街抗議。同樣喺周日搞起動大會嘅人民力量，尋日講明當日忙極亦會派人去支持，仲向港府拋出三項解決方案，再三強調人民力量唔係只識「有破壞冇建設」。佢哋句句有骨，似乎寸緊社民連近期「瞓路軌」嘅抗爭行動喎。
推出正面政策「第一波」
人民力量建議港府主動以換地方式，同發展商交換具爭議性嘅土地，以平息對方同地區居民嘅糾紛，例如以政府土地、喺勾地表撥出土地，又或允許發展商改變佢哋現時擁有嘅農地用途，仲話咁樣可以將現時嘅「三輸局面」扭為「三贏局面」。立法會議員陳偉業聲言，上星期見完發展局局長林鄭月娥後，對方認為「有得諗」喎。
人民力量發言人甄燊港就話，今次係佢哋推出正面政策嘅「第一波」，仲話周日嘅起動大會後，人民力量將會對施政提出更多正面建議，強調佢哋唔係「破壞力量」，係「建設力量」喎。