政情：棠哥病假避過兩大炸彈

向「派錢」「工資指引」開火

過去幾個月棠哥慘受頸椎移位之苦，一度要向行會告假成個月，幸好上個月動過手術之後，已經在康復中，尋日亦現身行會出席會議。就喺棠哥臥病在床、缺席行會呢段期間，財政司司長曾俊華宣布咗佢嗰份令到天怒人怨嘅財政預算案，之後又喺全城鬧爆之下迅速跪低，宣布派六千蚊。接住又有無講明飯鐘錢同休息日點計嘅最低工資參考指引，可謂一波未平一波又起！

喺呢個充滿張力嘅時候復出亮相嘅棠哥，前日喺電視節目點評派六千蚊建議，佢大鬧特區政府未能掌握民意，提醒派錢準則宜鬆不宜緊，「唔好派錢派出個大頭佛」，尤其不宜為新移民設資產審查。此外，佢喺另一場合仲向最低工資參考指引開火，譴責唔將飯鐘及休息日納入支薪範圍之餘，仲話政府應該立法釐清問題。

棠哥一復出就一鳴驚人，不過佢似乎意猶未盡。尋日佢出席行會之後再度開腔，表示好擔心份指引會觸發更多勞資糾紛，重申政府好應該立法釐清飯鐘錢及休息日問題，然後呼籲僱主們唔好斤斤計較、算死草，否則大家只會兩敗俱傷！佢喺政府總部門口以勞工界領袖嘅姿態發言，暫時將佢行會成員嘅身份拋諸腦後。

行會素來有兩大法條：保密制同集體負責制。棠哥尋日講得咁振振有詞，可能係行會商議派錢及指引時，棠哥根本不在場，自然不受集體負責制影響，君不見平時幫基層幫到出晒面嘅行會召集人梁振英，尋日被問到有關指引嘅問題時三緘其口咩？

雖然棠哥講得非常之暢快，但始終要記住佢仍然係行會成員嘅身份，兩大法條繼續適用於佢，一旦小器嘅曾蔭權老羞成怒，要搵棠哥算帳就唔好啦。其實如果佢想暢所欲言，離開行會，唔使再受政府立場嘅羈絆，就係最好嘅辦法。