中環出更：周國豐習武家藏木人樁
香港係臥虎藏龍之地，好多政商名人嘅嗜好有時都幾估佢唔到。好似已故名人周啟邦囝囝大律師周國豐（Brandon），原來佢拜師習詠春已經兩年，屋企仲有個木人樁方便佢隨時玩番兩下。
霍震寰練功「蜻蜓點水」
武術聯會日前舉行春茗，現場武林高手雲集，認真唔講得笑。卓妮見Brandon同太太現身，細問之下，原來佢嚟撐詠春師傅江志強嘅場，江師傅名氣唔小，好似靚女藝人Maggie Q都係佢嘅徒弟。Brandon話，佢嘅律師工作好忙，所以平時得閒就會喺屋企練半小時詠春，亦都盡量抽空去位於天后嘅道館習武。除咗中國武術之外，Brandon都好鍾意日本嘅居合道，經常上網去睇相關資料。
咁熱鬧嘅場合又點少得聯會會長霍震寰，佢練咗形意拳多年，卓妮好想知佢係咪已經打遍天下無敵手。不過佢謙稱最近工作忙碌，得閒就練，唔得閒就唔練。習武好似蜻蜓點水咁隨意，唔通佢已臻出神入化嘅高手境界？