中環出更：銀行高層分析災後經濟
日本嘅大地震同核事故令唔少投資者對經濟環境失去信心，香港股市畀呢股氣氛影響，同樣變得冇乜方向，唔上唔落咁僵持住。恒生銀行兩位高層，包括總經理馮孝忠同副董事長兼行政總裁梁高美懿尋日出席一項活動時都分別同大家分析環球經濟，兩位都叫大家要謹慎，但就唔使咁悲觀。
馮孝忠指毋須悲觀
馮孝忠係恒生銀行投資部門嘅話事人之一，佢自己分析，日本地震固然係慘絕人圜，不過經濟損失其實只係佔日本國民生產總值差唔多半成，加上美國經濟數據好轉，完成呢一次量化寬鬆貨幣政策後應該唔會再繼續，近排仲有人吹風話美國會加息添，所以環球經濟並唔係太悲觀。
馮孝忠仲話，災難發生後，已經開始有人炒緊重建概念，所以香港股市波幅唔算勁喎。至於梁高美懿就分析，海嘯地震對經濟影響其實係有限，因為呢類災難可以預計到個復原期，反而核輻射就認真慘，因為都唔知要拖幾耐，所以未來半年都要謹慎，同注視事態發展。