中環出更：浸大籌款達標王英偉請客
各間大學近年拗手瓜「撲水」，戰況激烈。「招財」策略，除咗講人面，仲考決心。浸大校董會主席王英偉（Wilfred）兩個月前許下目標，希望浸大今年籌到一億五千五百萬元，金額唔嘢小，話口未完，筆錢喺短短兩個月達標。Wilfred兌現承諾，話準備請晒董事局成員及全體教授食飯慶祝。
Wilfred前日代表浸大收咗張一億港元巨額支票，筆錢由孔憲紹慈善基金捐出，支持該校成立創意研究院，孔憲紹夫人及兒媳齊出席頒支票儀式，浸大校長陳新滋當然坐鎮主持大局。Wilfred心情靚爆，順便宣布，浸大五十五周年校慶活動正式啟動。
Wilfred喺商界人脈廣，「撲水」冇難度。月前佢信心十足，話希望盡快籌到億五元，承諾達標就請食飯，估唔到短短兩個月，夢想成真。幾時請食飯？佢就話籌劃緊，好快成事。至於會否加碼籌夠兩億元？Wilfred就話，希望全體師生齊努力喎。
謝志偉無懼輻射襲港
久違了嘅浸大榮休校長謝志偉都嚟湊熱鬧，講起日本核災難，佢話香港同日本相距三千公里，縱使有輻射塵粒飄來港，分量相當輕微，不足以構成殺傷力喎。