中環出更：民主阿婆就地試衫晒「肉」臂
陳方安生多年前由政務司司長嘅位置退下，一直不甘寂寞要延續自己嘅影響力，佢月旦政事，忽然民主，做咗民主阿婆，連立法會議員都選埋。不過一個人做番啱自己身份嘅事，一定係暢快啲，好似恤髮、Shopping，佢就分外樂在其中。星期日佢喺時裝店試衫，忘形得竟然連更衣室都懶得行入去，就地除咗件外套。
收起「四萬」 木無表情
星期日嘅中環，分外清靜，卓妮見到髮型一絲不苟嘅陳太同囡囡陳慧玲逛街Shopping。兩人喺名店Vica Moda內揀衫。只見店員落力上前推介新裝，但陳太木無表情，同佢平時喺公開場合總係不忘保持住四萬咁口，幾乎係兩副面孔。
囡囡慧玲出名係陳太嘅乖乖女，佢全程陪實媽媽，間中畀吓意見。揀咗十分鐘，陳太忽然發現咗一件藍色花外套，愈望愈鍾意，連更衣室都懶得行入去，二話不說脫去深灰色冷外套，喺舖頭裏面即場試身。呢一脫，認真勇。事關當日天氣都幾凍，囡囡慧玲要着住件薄羽絨褸保暖，估唔到阿媽咁勇，話脫就脫，露出一件白色背心，一雙「肉」臂同渾圓嘅腰身，完全唔介意暴露於人前。
試完件藍色外套，陳太意猶未盡，繼續喺店內左摷右摷，一時睇吓恤衫，一時試吓絲巾，揀足半粒鐘，一直都未有着番件外套。兩母女最後兩手空空離去，至於佢有無吩咐店員改衫或者送貨，就唔知嘞。
Vica Moda係歐洲名店，名下有四個牌子，分別針對唔同年齡層嘅女士，標榜衣料同牌子都同樣優質。
卓妮