政情：肥仔明撐龕場一身蟻
香港寸金尺土，唔少人面對「陽宅貴、陰宅難」嘅困境，早前有骨灰龕場撥出五百個龕位畀輪候緊公營龕位嘅先人，可免費使用三年。有關行動宣布當日，民主黨立法會議員李華明都有撐場，點知原來有關龕場未完全符合發展局規定，各界關注骨灰龕法案大聯盟尋日就發聲明炮轟肥仔明冇誠信，仲質疑當中有利益輸送，幫違規龕場攞牌，仲鬧埋民主黨左右逢源，意見不一。
肥仔明畀人咁鬧法自然嬲到爆，覺得有人含血噴人、亂做文章。佢話撐場唔係幫該龕場攞牌，而係覺得好多人過身後連龕位都冇，流落於棺材舖，好冇尊嚴，希望幫啲貧苦大眾啫！肥仔明實牙實齒話冇收過任何利益，同埋見呢間龕場有規模又唔影響民居先至幫手。
不過，肥仔明承認，一早就知間龕場未合法例規定，但本着善心去支持，點知畀人抹黑，覺得好無辜，仲話如果有人覺得佢咁做唔妥當，或者真係認為佢有收受利益，有證據就可以去告佢喎！