政情：項明生血饅頭諷搶鹽
日本地震及海嘯舉世震驚，但日本人「泰山崩於前」仍然能秩序井然嘅態度更令世界動容。身為Sony Computer Entertainment香港公司市場部總經理嘅項明生（James）都大為驚嘆，反觀港人「盲搶鹽」淪為國際笑話，令佢想起百年前留學日本仙台嘅作家魯迅，筆下嘅血饅頭故事正正反映群眾迷信，以為進食咗蘸有死囚血嘅饅頭就可以藥到病除。
James尋日出席一項活動時話，佢慶幸香港冇發生災難，覺得今次係一個好好嘅學習機會，希望大家可以學到日本人處變不驚同危難中互相幫助嘅精神。James仲話，佢有好多開設日本餐廳嘅朋友都大呻生意受影響，所以佢都義不容辭幫手推廣，而且喺安全情況下會繼續食日本菜。不過，James對核能發電有啲擔心，認為毋須採用核能，因為好多再生能源都好乾淨，既環保又安全喎。