政情：梁智仁唔揼校友心口
喺香港做大學校長，個個都係萬能博士，周身刀要張張利，但最重要係識得「吸水大法」，為大學籌募經費。香港公開大學將會喺何文田警署附近一幅地皮興建第三期校園，建造費要六億多元，其中三億一千七百萬元可以免息分期，其餘要靠籌款埋尾，搞到校長梁智仁身負重任，要向各方善長撲水。
本港好多歷史悠久嘅大學，都有名人校友向母校「泵水」，但梁校長坦言，公開大學校友主要係以勤力上進嘅基層人士居多，所以都好難開口叫校友捐錢，當然隨緣樂助都無任歡迎，但主力都係傾向搵社會賢達及大企業家幫手。梁校長滿有信心話，佢已經有晒實質計劃，並非只空談概念。
雖然未知籌款係咪理想，但梁校長希望申請能獲城規會順利通過，可以喺九月動工，趕及兩年後落成啟用，配合九月開學時間，唔使浪費資源。其實社會上熱心人或機構都唔少，好似早前馬會就捐咗一千五百多萬元予公開大學興建視聽製作中心，將教育頻道放上網，讓有意進修嘅同學毋須受到時間同空間限制。