政情：鬍鬚曾亂派錢未拆彈
財爺鬍鬚曾亂派六千蚊圖保官銜，但公布咗三星期仍無任何細節，市民鬧爆之餘，身為「庸官殺手」嘅前高官王永平亦睇到眼火爆，喺電台節目上力數派錢方案漏洞多，有五大問題仍未解決，仲炮轟鬍鬚曾面皮超厚，竟敢喺毫無細節下要求立法會開空頭支票先通過預算案。平叔預言，政府會喺七一遊行之前落實向市民派錢，以緩和民怨，但以鬍鬚曾嘅能力，要解決五大難題又談何容易呢？
「史上最廢」預算案公布咁耐，平叔就鬧足咁耐，尤其見到鬍鬚曾至今對派錢細節避而不談，惟有開腔點醒鬍鬚曾。平叔話現時有五大派錢疑團未解決，包括市民幾時有錢落袋？幾時生日先算滿十八歲？冇銀行戶口嘅市民點攞錢？港府希望鼓勵市民儲蓄，咁利息點計？同埋已經移居海外嘅香港人又可以點攞錢呢？雖然鬍鬚曾封口唔答任何問題，但平叔尋日就送埋答案畀鬍鬚曾當做善事。
指「七一」係好時機
平叔特別關注派錢時間，佢話鬍鬚曾月初公布派錢，市民希望政府幾個月內派錢係合情合理，所以當局無理由拖到年底先至派，而七一慶回歸係個好時機，到時政府大條道理話派錢與民同樂，大家都開開心心，仲可以拆走政治炸彈。平叔分析現時民怨高漲，嚟緊七一遊行人數更加係壓垮駱駝嘅最後一根稻草，如果七一前成功派錢，中產人士收咗錢就去吓旅行，七一熱潮自然會冷卻，對政府薄弱嘅管治威信還有一線生機。
至於今年夠十八歲嘅年輕人，邊啲先夠資格攞六千蚊，平叔認為財政年度由四月一日起開始，用呢日嚟劃界就最公道。至於利息方面，既然金融管理局嘅投資回報有六至七厘，用番同一水平亦好合理。
平叔嘅分析不無道理，但距離七一只剩番三個幾月，以政府畏首畏尾嘅辦事方式，係咪真係可以成功於三個月內解決派錢問題，實在令人好懷疑。圓滿派錢當然大家開心，但如果臨急抱佛腳，派錢過程甩甩漏漏，一個唔該再遺失市民資料，或者派現金時出現爭先恐後嘅混亂情況，分分鐘自掘墳墓，到時顧此失彼，可能仲大鑊過乜都唔做，到時鬍鬚曾想唔提早落台都幾難。