政情：方剛轟鬍鬚曾嘥公帑
財爺鬍鬚曾份「史上最廢」預算案令民怨沸騰，大家都記得，佢制訂預算案前做咗好大場諮詢大龍鳳，又賣廣告又印小冊子，結果預算案出嚟貨不對辦，令人質疑佢假諮詢。一直杯葛預算案書面質詢嘅自由黨副主席方剛，終於忍唔住喺下星期三立法會大會提出書面質詢，誓要揭穿鬍鬚曾嘅西洋鏡。
今次方剛提質詢，主要係叫鬍鬚曾唔好再浪費公帑搞預算案假諮詢同個人宣傳，其實佢兩年前已經提過一次同類質詢，點知鬍鬚曾不但做咗「聾耳陳」，而且變本加厲，仲要搞咗份最廢嘅預算案出來。方剛話，既然鬍鬚曾唔考慮諮詢意見，就唔好再勞民傷財，來年應考慮調整諮詢方式，甚至取消公眾諮詢喎。
其實又好難怪方剛咁嬲，份預算案除咗無回應市民訴求外，仲無啦啦大幅增加煙草稅及汽車首次登記稅，搞到業界哀鴻遍野。方剛身為批發及零售界代表，今次決定喺大會上提書面質詢，好明顯就係想全方位咁聲討鬍鬚曾啦，睇怕鬍鬚曾都唔使旨意有望甩身喇。