政情：救人英雄劉楚釗紮職
每次港人在海外遇到嚴重意外或災難，東區醫院急症室主管劉楚釗都會臨危受命，帶領一隊醫護人員救災。呢位「救人英雄」獲醫院管理局賞識紮職，五月一日起升任為港島東醫院聯網總監，代替即將退休嘅現任總監任燕珍，確實可喜可賀。
唔講唔知，劉醫生嘅救人威水史真係有電話簿咁厚，由早幾年嘅南亞海嘯、台灣九份車禍、埃及車禍、四川地震，以至去年馬尼拉人質慘劇，劉醫生都擔當重要角色，帶領本港嘅「雷霆救兵」，親赴當地展開救傷工作。劉醫生去年到馬尼拉協助拯救慘劇傷者時，好果斷咁分析腦部受創嘅梁頌學（Jason）傷勢，即時要求本港腦科專家方道生醫生到當地幫手，成功帶重傷嘅Jason返港就醫，實在應記一功。
劉醫生尋日表示，升職之後要睇住聯網轄下嘅醫院，唔可以再隨時候命救災，直言好唔捨得呢份工，但相信醫管局大把救災人才，公眾毋須擔心。至於未來工作大計，佢就話要與同事有商有量，聽取民意。