政情：黑英促十日內炒孫公
前天文台台長林超英（黑英）就政府迫令其母校英皇書院減班好不滿，佢嬲起上嚟真係唔係人咁品，佢尋日又出招，叫煲呔曾十日內炒咗教育局局長孫明揚。佢叫煲呔曾慎思，唔好畀海浪變成海嘯。
「閣下還在等甚麼」
黑英尋日去信煲呔曾，佢喺信中質疑，呢兩個星期，孫公對事件繼續保持緘默，即係代表乜嘢呢？係事實俱在，無話可說，黑英更質問煲呔曾：「請問閣下還在等甚麼？」
黑英亦以香港大學最新民意調查作為證據，話孫公已經變成特區政府嘅「負資產」，為特區政府增添煩亂，如果佢繼續在位，係對其他用心盡力和勤政愛民嘅局長嘅不敬，甚至係侮辱。黑英仲引經據典咁話，古語云：「君，舟也，人，水也。水能載舟，亦能覆舟」，懇請煲呔曾「當機立斷，報請中央人民政府，撤銷孫明揚先生的局長職務，既挽回特區政府的誠信，也展示你的強政勵治」。特區政府既無誠信又不強政勵治，當然唔會採取行動喇，睇嚟黑英都要諗定下一招搞乜嘞。