日本核災難有好轉迹象，股神巴菲特都唱好日本經濟，大力推薦買日股，但香港大孖沙就另有睇法。卓妮日前喺香港會所外遇到新世界發展董事總經理鄭家純，問佢點睇日本呢場災難，純官就話連佢都睇唔通，亦未知對香港影響有幾深，好難下判斷，而佢亦無喺日本投資，但會密切關注事態發展。純官大公子鄭志剛曾留學日本，佢要掌握當地最新消息，應該無難度。
（徐家浩攝）
