中環出更：龐維新high tea大陣仗
專注地產生意嘅前仁愛堂主席龐維新，同細佬即金牌大風主席龐維仁都係超級大忙人，但原來一到星期日，兩兄弟就變身住家男，帶父母妻女齊齊high tea。
卓妮尋日晏晝撞見佢哋喺置地Landmark Cafe歎茶，同行仲有龐爸爸及龐媽媽盧淑燕，連埋外傭及友人在內，十四人坐滿一圍枱，一家大細放假齊享天倫，就係咁嘅一回事。
龐媽媽柯打最愛嘅蝦多士，仲有龍蝦意粉及煙三文魚，美食擺滿枱。期間，龐媽媽同大新抱董晶怡及未來新抱Cindy好好傾，氣氛融洽。龐維新同囡囡有講有笑，囡囡仲不時走埋叔叔龐維仁身邊，逗對方玩手機遊戲，維仁嘅B女Luisa就喺外傭懷中熟睡，懶理大人傾偈。龐家high tea大半粒鐘先至走人。卓妮上前問龐維新係咪開家庭會議，佢答得幽默話:「呢排冇得食日本菜，咪嚟呢度飲茶囉。」